ᓴᖅᑭᑕᐅᓂᑯ 1993-ᒥ, ᑲᑕᓐᓂᓕᒃ ᒥᕐᙳᐃᖅᓯᕐᕕᒃ ᐸᐸᑦᑎᕗᑦ 1200 ᐅᖓᑖᓂ ᑭᑉᐹᕆᒃᑐᓂ ᑭᓛᒥᑐᓂ ᑲᔾᔮᕐᓇᖅᑐᒻᒪᕆᖕᓂ ᐅᑭᐅᖅᑕᖅᑐᒥ ᑐᐊᐸᖕᒥᑦ. ᒥᕐᙳᐃᖅᓯᕐᕕᒃ ᑕᐅᕗᖓ ᐅᐊᖕᓇᒧᑦ ᑎᑭᓐᓂᖃᖅᖢᓂ ᐃᑭᕋᓴᕐᔪᐊᒥᑦ ᑕᓯᐅᔭᕐᔪᐊᖓᓂ ᑭᒻᒥᕈᒻᒥ, ᑕᐅᕗᖓ ᒥᑕ ᐃᓐᑲᒡᓃᑐ ᓄᕗᑯᑖᖓᓄᑦ ᐅᖓᓯᒃᑎᒋᔪᒧᑦ ᐃᖃᓗᐃᑦ ᐃᒪᖓᓄᑦ. ᑰᔾᔪᐊᖅ, ᐃᓚᒋᔭᐅᓪᓗᓂ ᑲᓇᑕᒥ ᐃᑦᑕᕐᓂᓴᓄᑦ ᑰᖑᔪᓄᑦ ᐱᓕᕆᔾᔪᓯᐅᔪᓄᑦ, ᐃᖏᕐᕋᕗᖅ ᒥᕐᙳᐃᖅᓯᕐᕕᒃᑯᑦ, ᑯᕕᕙᓪᓕᐊᓪᓗᓂ ᖁᑦᑎᒃᑐᓂ ᓄᓇᒻᒪᕆᖕᓂ ᓄᕗᑯᑖᓕᖕᓂ ᑕᐃᑯᖓ ᐃᑭᕋᓴᕐᔪᐊᒥᑦ ᑕᓯᐅᔭᕐᔪᐊᖓᓂ. ᑰᖑᔪᖅ ᑕᐅᓄᙵᐅᓪᓗᓂ ᓄᓇᒻᒪᕆᖕᓂ, ᐱᐅᔪᒻᒪᕆᐊᓗᖕᓂ ᐊᓯᔾᔨᖅᐸᓪᓕᐊᓂᖃᖅᐳᖅ ᑲᔾᔭᐅᓴᖕᓂᐅᔪᓂᑦ, ᐃᓚᖃᖅᖢᓂ ᖃᖅᑲᓂ, ᐃᓗᑐᔪᓂᑦ ᑐᐊᑦᑐᓂ ᓇᖅᓴᓂᑦ, ᐊᒻᒪᓗ ᐊᒥᓱᐊᓗᐃᑦ ᑰᕌᓗᐃᑦ (ᐊᑎᖓ ᑲᑕᓐᓂᓕᒃ ᑐᑭᖃᖅᐳᖅ “ᐃᓂᒋᔭᐅᔪᖅ ᑰᒃᑐᐊᓗᖕᓂ” ᐃᓄᒃᑎᑐᑦ). ᒥᕐᙳᐃᖅᓯᕐᕕᒃ ᐱᑕᖃᐅᕆᕗᖅ ᓱᐳᑎᓂᑦ, ᐃᓚᖏᓐᓂ ᐊᖏᓛᖑᔪᓂᑦ ᓇᐹᖅᑐᖃᕐᓂᐅᔪᓂᑦ ᓇᓂᔭᐅᔪᓐᓇᖅᑐᓂ ᕿᑭᖅᑖᓗᖕᒥᑦ ᓇᐹᖅᑐᖃᙱᓐᓂᐅᔪᓂ. ᓄᓇᖓ ᒥᕐᙳᐃᖅᓯᕐᕕᖕᒥ ᓴᓇᔭᐅᓂᓂᑰᕗᖅ ᐊᕐᕌᒍᒐᓵᓗᖕᓂ ᓯᕐᒥᐅᓂᖃᕐᓂᕐᒧᑦ, ᐊᒻᒪᓗ ᑐᕌᖓᓂᖃᖅᑎᑦᑎᓂᑰᕗᖅ ᑲᒪᓇᖅᑐᓂ ᐃᓐᓇᕈᓂᑦ, ᐃᓚᖏᑦ ᑕᑉᐸᐅᙵ ᖁᑦᑎᖕᓂᓖᑦ ᓯᓂᖓᓂ ᐃᒪᕐᒥᑦ ᖁᑦᑎᖕᓂᐅᔪᓂᑦ 305 ᒦᑕᓄᖅ (1000 ᐃᓯᒐᓪᓗᐊᓂᑦ).
ᐊᒥᓱᐊᓗᖕᓂ ᐆᒪᔪᖅᑕᖃᐅᖅᐳᖅ ᒥᕐᙳᐃᖅᓯᕐᕕᖕᒥᑦ, ᐃᓚᖃᖅᖢᓂ ᑐᒃᑐᓂ, ᐅᑲᓖᑦ, ᐊᕿᒡᒌᑦ, ᐊᒻᒪᓗ ᐊᒪᕈᕐᓂ. ᓇᓄᖅᑕᓕᒃ ᐊᒻᒪᓗ ᐳᓚᕋᖅᑎᐅᔪᑦ ᒥᕐᙳᐃᖅᓯᕐᕕᖕᒧᑦ ᐊᒻᒪᓗ ᓄᓇᕗᒻᒧᓪᓗ, ᐅᖃᓕᒫᕐᓂᖃᓪᓗᐊᖅᑐᑦ ᐊᐅᓪᓛᕐᓂᕐᒧᑦ ᐊᑦᑕᓇᔾᔭᐃᖅᓯᒪᓂᕐᒧᑦ ᓇᓄᖃᖅᑐᒧᑦ ᓄᓇᓕᐊᕐᓂᕐᒧᑦ. ᑕᑯᒍᒃ ᐅᖃᐅᓯᒃᓴᐅᔪᑦ ᐊᑐᐃᓐᓇᐅᔪᓂ ᐅᕙᓂ: www.nunavutparks.com. ᐳᓚᕋᖅᑎᐅᔪᑦ ᒥᕐᙳᐃᖅᓯᕐᕕᖕᒧᑦ ᐊᑎᓕᐅᕆᐊᖃᖅᐳᑦ ᑕᒪᒃᑮᓄᑦ ᐃᓯᕈᑎᒃ ᐊᒻᒪᓗ ᐊᓂᓕᕈᑎᒃ.
ᐊᐅᔭᒃᑯᑦ, ᒥᕐᙳᐃᖅᓯᕐᕕᒃ ᕿᒥᕐᕈᔭᐅᔪᓐᓇᖅᐳᖅ ᐱᓱᒡᓗᓂ ᐊᒻᒪᓗ ᐅᒥᐊᒃᑯᑦ, ᐅᒥᐊᕋᓛᒃᑯᑦ ᖃᔭᒃᑯᓪᓘᓐᓃᑦ, ᐊᒻᒪᓗ ᐊᒥᓱᓂ ᐊᒃᓱᕈᕐᓇᖅᑐᓂ ᖃᐳᐊᕐᔪᐊᖅᑐᓂ ᓱᕝᕙᑲᓪᓚᓂᑦ ᑰᒃᑯᑦ-ᖃᔭᖅᑐᕈᒻᒪᐅᔪᓄᑦ. ᐅᑭᐅᒃᑯᑦ, ᐊᕕᒃᑐᖅᓯᒪᓂᐅᔪᒥ ᕿᒥᕐᕈᔪᓐᓇᖅᐳᖅ ᓯᐊᕐᕆᔭᐅᑎᑯᑖᒃᑯᑦ, ᓯᑭᑑᒃᑯᑦ ᐊᒻᒪᓗ ᕿᓱᒃᓯᒃᑯᑦ. ᐃᑦᑕᕐᓂᓴᐅᓪᓗᓂ ᓄᓇᒃᑯᑦ ᐃᒡᓕᓂᖓ, ᐃᑎᔾᔭᒋᐊᖅ ᐃᒡᓕᓂᖓ, ᐃᖏᕐᕋᔪᖅ 120 ᑭᓛᒥᑐᒥ ᑕᐅᕗᖓ ᓄᕗᑯᑖᖓᓄᑦ ᐃᖃᓗᐃᑦ ᐃᒪᖓᓐᓄᑦ, ᓯᑭᑑᕐᕕᑦᑎᐊᕚᓘᕗᖅ ᐃᒡᓕᓂᐅᓪᓗᓂ ᐅᑭᐅᒃᑯᑦ.
ᑕᖃᐃᖅᓯᕐᕕᒃ ᓄᓇᕗᒻᒥ ᒥᕐᙳᐃᖅᓯᕐᕕᒃ ᑕᖕᒫᕐᕕᖓ ᓂᕈᐊᒐᑦᑎᐊᕙᐅᕗᖅ ᑕᐃᒃᑯᓄᖓ ᑕᖕᒫᕈᒪᔪᓄᑦ ᒥᕐᙳᐃᖅᓯᕐᕕᐅᑉ ᖃᓂᒋᔭᖓᓂ ᐊᒻᒪᓗ ᖃᓂᓪᓗᓂ ᑭᒻᒥᕈᒻᒧᑦ. ᑕᖕᒫᕐᕕᖓ ᓄᑖᙳᕆᐊᖅᑎᑕᐅᓵᓚᐅᖅᐳᖅ ᒫᓐᓇᓕᓵᒥ, ᐊᒻᒪᓗ ᖁᐃᔭᖅᑐᕐᕕᓕᒃ, ᑐᐱᑉᓄᑦ ᐃᓂᒃᓴᓂᑦ ᐊᒻᒪᓗ ᐃᑭᑎᑦᑎᕕᓂᑦ. ᖃᐅᔨᒋᐊᒃᑲᓐᓂᕋᓱᒡᓗᓂ ᑕᖕᒫᕐᓂᕐᒧᑦ ᓇᓂᔭᐅᔪᓐᓇᖅᐳᑦ ᒥᕐᙳᐃᖅᓯᕐᕕᐅᑉ ᐳᓚᕋᕐᕕᖕᒧᑦ ᐊᒻᒪᓗ ᐊᑐᐃᓐᓇᐅᕗᖅ ᐅᕙᓂ: www.nunavutparks.com.
ᐅᑯᐊ ᒪᓕᒃᑐᑦ ᖃᕋᓴᐅᔭᑎᒍᑦ ᑐᑭᓯᒋᐊᖅᑕᕐᕕᐅᔪᑦ ᐅᖃᐅᓯᒃᓴᖃᒃᑲᓐᓂᖅᐳᑦ ᐃᓕᖕᓂ ᐃᑲᔪᕐᓂᐊᖅᑐᒥ ᐸᕐᓇᐃᓂᕐᒧᑦ ᐳᓚᕋᕐᓂᐊᕐᓂᕐᓄᑦ ᒥᕐᙳᐃᖅᓯᕐᕕᖕᒧᑦ:
www.nunavutparks.com/english/parks-special-places/katannilik-territorial-park/overview.aspx
www.nunavutparks.com/english/parks-special-places/soper-heritage-river/overview.aspx
www.nunavutparks.com/english/parks-special-places/taqaiqsirvik-territorial-park/overview.aspx