ᑕᐃᒪᙵᑦ ᓇᓂᓯᓚᐅᕐᓂᖏᓐᓂ ᖃᔅᓯᒐᓚᖕᓂ ᐊᑭᑐᔪᒃᓴᓂ ᐊᒻᒪᓗ ᐊᑭᑐᒐᓚᒃᑐᓂ ᐅᔭᖅᑲᓂ ᑭᒻᒥᕈᑦ ᖃᓂᒋᔭᖓᓂ, ᐊᖏᒡᓕᒋᐊᕐᓂᖃᖅᓯᒪᕗᖅ ᓴᓇᓂᕐᒧᑦ ᐱᐅᓴᐅᑎᒃᓴᓂ ᐊᑐᒐᒃᓴᓂ, ᐊᑐᕐᓂᖃᖅᑐᓂ ᑖᒃᑯᓇᓂ ᐅᔭᖅᑲᓂ. ᓄᓇᐅᑉ ᑐᑭᖏᓐᓄᑦ, ᐊᕕᒃᑐᖅᓯᒪᓂᐅᔪᖅ ᑭᒻᒥᕈᑦ ᖃᓂᒋᔭᖓᓂ ᐊᔾᔨᐅᙱᓚᖅ, ᐊᔾᔨᖃᕐᓂᖃᐸᓗᒃᖢᓂ ᐅᖓᓯᒃᑑᑎᐊᓗᖕᓂ ᓄᓇᒋᔭᐅᔪᓂ ᓲᕐᓗ ᐋᕝᒑᓂᔅᑖᓐ, ᒪᐃᔭᓐᒫᕐ ᐊᒻᒪᓗ ᕖᐊᒃᓈᒻ ᐱᔾᔪᑎᖃᖅᖢᓂ ᐊᔾᔨᒌᙱᓐᓂᐅᔪᓂ ᐅᔭᕋᐅᔭᕐᓂ ᑐᖅᑯᖅᓯᒪᔪᓂ ᓇᓂᔭᐅᔪᓐᓇᖅᑐᓂ ᑕᒫᓂ. ᑲᒪᓇᓗᐊᖅᑐᖅ, ᑭᒻᒥᕈᑦ ᐊᑕᐅᓯᐅᓪᓗᓂ ᐃᓂᒋᔭᐅᕗᖅ ᓯᓚᕐᔪᐊᓕᒫᒥ ᐃᓂᖃᐅᖅᑐᓂ ᐱᐅᒋᔭᐅᒻᒪᕆᒃᑐᒥ ᑐᖑᔪᖅᑐᒥ ᐅᔭᖅᑲᒥ, ᓚᐱᔅ ᓚᓱᓕᒥᑦ. ᐱᐅᓂᖓᓂ ᐅᔭᖅᑲᒥ ᐊᑦᑎᒃᑎᓪᓗᒍ, ᐱᑕᖃᒐᔪᙱᓚᑦ ᐊᒻᒪᓗ ᕿᓂᒃᓴᖅᑕᐅᔪᒥᓇᖅᖢᑎᒃ. ᐊᓯᖏᑦ ᐅᔭᖅᑲᐃᑦ ᓇᓂᔭᐅᔪᓐᓇᖅᑐᑦ ᐃᓚᖃᖅᐳᑦ ᓵᕙᐃᔭᓂᑦ, ᐊᐸᑕᐃᑦ, ᔅᐸᐃᓄᓪ, ᑐᐊᒧᓖᓐ ᐊᒻᒪᓗ ᒑᓂᑦ. ᐊᑭᑐᔪᒃᓴᔭᖅ ᐅᔭᖅᑲᓄᑦ ᐃᓕᓐᓂᐊᕐᓂᐅᔪᒥ ᐱᓕᕆᐊᖑᓚᐅᖅᐳᖅ ᐊᕕᒃᑐᖅᓯᒪᓂᐅᔪᒥ 2002-ᒥ, ᐊᒻᒪᓗ ᑕᐃᒪᙵᑦ ᓄᓇᓕᐅᔪᓂ ᐃᓚᐅᔪᑦ ᐃᓚᓕᐅᔾᔨᖃᑦᑕᓕᖅᐳᑦ ᐱᐅᓴᐅᑎᓂ ᐊᑐᒐᒃᓴᓂ ᓴᓇᓂᕐᒧᑦ ᓄᓇᓕᐅᔪᓂ ᓴᓇᐅᒐᓕᕆᓂᕐᒧᑦ ᐱᖅᑯᓯᐅᔪᓂᑦ, ᐱᐅᓴᐅᑎᓄᑦ ᐊᑐᒐᒃᓴᓂ ᓴᓇᐅᒐᓕᕆᔨᐅᔪᑦ ᓲᕐᓗ ᒥᐊᕆ (ᒥᐊᓕᐊ) ᐋᑲᕙᒃ, ᑎᐊᕆ ᐃᑦᑐᓗ ᐊᒻᒪᓗ ᓯᒥᒐᖅ ᐊᖅᐱᒃ ᓴᖅᑭᑎᑦᑎᓯᒪᕗᑦ ᐱᐅᔪᒻᒪᕆᖕᓂ ᐊᒻᒪᓗ ᐊᑐᓂ ᐱᓕᕆᓂᐅᔪᓂᑦ ᐊᑐᕐᓂᖃᖅᑐᓂ ᐃᓚᖏᓐᓂ ᑕᒪᒃᑯᓂᖓ ᓄᓇᓕᐅᔪᓂ ᐱᐅᔫᑎᒻᒪᕆᖕᓂ. ᕿᓂᕐᓂᖃᒃᑲᓐᓂᕐᓗᓂ, ᑕᒪᓐᓇ ᓄᑖᖅ ᓴᓇᐅᒐᓕᕆᓂᖅ ᓂᕆᐅᒋᔭᐅᔪᓐᓇᖅᐳᖅ ᓴᖑᓂᐊᕐᓂᖓᓂ ᐊᔾᔨᐅᙱᑦᑐᒥ ᐊᒻᒪᓗ ᐊᓕᐊᓇᐃᒻᒪᕆᒃᑐᒥ ᑐᕌᖓᓂᐅᔪᓂᑦ.
ᐱᓕᕆᐊᖑᓂᑯᑦ ᓄᓇᓕᖕᓂ ᐱᐅᓴᐅᑎᓄᑦ ᐊᑐᒐᒃᓴᐅᔪᓂ ᓴᓇᐅᒐᓕᕆᔨᐅᔪᓄᑦ ᓇᓂᔭᐅᔪᓐᓇᖅᐳᑦ ᓂᐅᕕᐊᒃᓴᐅᓪᓗᑎᒃ ᓲᐳᕐ ᐃᒡᓗᒧᑦ ᑕᑯᓐᓇᒐᖃᕐᕕᖓᓂᑦ.