ᖃᖓᑐᐃᓐᓇᑦᑎᐊᖅ ᐊᕐᕌᒎ ᐃᓚᖓᓐᓂ ᑎᑭᒃᑯᕕᑦ, ᑭᒻᒥᕈᑦ ᐊᒥᓱᓂ ᑐᓂᔭᒃᓴᖃᖅᐳᑦ.
ᑲᔾᔮᕐᓇᕐᓂᐊᓗᐊ ᓄᓇᖓᓐᓂ, ᐊᒻᒪᓗᑦᑕᐅᖅ ᑕᑯᔪᓐᓇᕐᓂᐅᒐᔭᖅᑐᒥ ᐃᒪᕐᒥᐅᑕᓂ ᐊᒻᒪᓗ ᐆᒪᔪᓂᑦ, ᓇᓂᓯᓂᕐᒥ ᓄᓇᓕᖕᓂ ᑎᑎᕋᐅᔭᒐᓂ ᐊᒻᒪᓗ ᓴᓇᐅᒐᓂᑦ, ᐊᒻᒪᓗ ᐳᓚᕋᕐᓂᕐᒧᑦ ᐃᑦᑕᕐᓂᓴᓂ ᐃᓂᒋᔭᐅᔪᓂᑦ. ᐊᒥᓱᒐᓵᓗᖕᓂ ᐱᓱᔪᒡᕕᒃᓴᖃᖅᐳᑦ ᐊᐅᔭᒃᑯᑦ ᐊᒻᒪᓗ ᓯᐊᕐᕆᔮᕈᑎᑯᑖᖕᓄᑦ ᓯᑭᑑᒃᑯᓪᓘᓐᓃᑦ ᐃᖏᕐᕋᓗᓂ ᐅᑭᐅᒃᑯᑦ. ᐊᒥᓱᐊᓗᖕᓂ ᑕᓯᖃᐅᖅᑐᖅ ᐊᒻᒪᓗ ᑰᖕᓂ ᕿᒥᕐᕈᔭᐅᔪᓐᓇᖅᑐᓂ ᐅᒥᐊᒃᑯᒃ, ᖃᔭᒃᑯᑦ, ᐅᒥᐊᕋᓛᒃᑯᓪᓘᓐᓃᑦ. ᐸᖅᑭᔭᐅᓗᑎᑦ ᓄᓇᓕᖕᓂ ᒥᐊᓂᕆᔨᐅᔪᓂ, ᐳᓚᕋᖅᑏᑦ ᐊᖑᓇᓱᒍᓐᓇᖅᐳᑦ ᐃᖃᓗᒐᓱᒡᓗᑎᒡᓘᓐᓃᑦ, ᒪᓕᒡᓗᒍ ᖃᖓᐅᓂᖓᓂ ᐊᕐᕌᒍᒥ. ᓄᓇᖃᖅᑎᐅᔪᑦ ᑭᒻᒥᕈᒻᒥ ᓱᓕ ᐊᕝᕗᖅᐸᖅᐳᑦ ᐱᕈᖅᓯᐊᓂᑦ ᐊᒻᒪᓗ ᐊᖑᓇᓱᓲᖑᓪᓗᑎᒃ, ᐊᒻᒪᓗ ᖃᐅᔨᒪᓪᓗᑎᒃ ᐊᕕᒃᑐᖅᓯᒪᓂᖓ ᐊᑐᐃᓐᓇᖃᕐᓂᖓᓂ, ᑕᒪᒃᑮᓂᑦ ᕼᐋᒻᓚᐅᑉ ᖃᓂᒋᔭᖓᓂ ᐊᒻᒪᓗ ᖃᓂᒋᔭᖓᓂ ᑲᑕᓐᓂᓕᒃ ᓄᓇᕗᒻᒥ ᒥᕐᙳᐃᖅᓯᕐᕕᖓᓂ. ᐸᕐᓇᒃᓯᒪᕗᑦ ᐃᑲᔪᖅᓱᐃᓂᕐᒥᑦ ᐳᓚᕋᖅᑐᓂ ᐊᑐᕐᓂᖃᕈᒪᔪᓂ ᐱᒻᒪᕆᐅᔪᒥ ᐅᑭᐅᖅᑕᖅᑐᒥ ᐊᕙᑎᐅᔪᒥᑦ.
ᑭᒻᒥᕈᑦ ᐊᕙᓗᔭᐅᓯᒪᕗᖅ ᑲᔾᔮᕐᓇᖅᑐᒻᒪᕆᐊᓗᖕᓂ ᓄᓇᐅᔪᒥᑦ ᐅᑭᐅᖅᑕᖅᑐᒥ ᓇᐹᖅᑐᖃᕈᓐᓇᙱᑦᑐᒥ ᐊᒻᒪᓗ ᐅᔭᕋᐅᖅᑐᓂ ᖃᓕᕆᓱᕐᓂᑦ. ᖃᓂᒋᔭᖓᓂ ᑰᔾᔪᐊᖅ ᐃᖏᕐᕋᓂᖃᖅᐳᖅ ᓇᖅᓴᒃᑯᑦ ᐊᔾᔨᒌᙱᕈᓘᔭᖅᑐᓂ ᑲᔾᔮᕐᓇᖅᑐᐊᓗᖕᓂ. ᐅᑭᐅᖅᑕᖅᑑᑉ ᐃᒪᖓ ᐊᒻᒪᓗ ᐃᑭᕋᓴᕐᔪᐊᒥᑦ ᑕᓯᐅᔭᕐᔪᐊᖓᓂ ᖃᓂᒃᑐᑯᓘᒋᕗᑦ. ᐊᒥᓱᓂ ᐱᒃᑲᒻᒪᕆᖕᓂ ᒥᐊᓂᕆᔨᖃᐅᖅᐳᖅ ᐊᒻᒪᓗ ᐊᓐᓄᕌᖃᖅᑎᑦᑎᕙᒃᑐᓂ ᑭᒻᒥᕈᒻᒥ ᐊᐅᓪᓛᖅᑎᐅᔪᓂ ᐅᐸᒍᔾᔭᐅᔪᓐᓇᖅᑐᓂ ᐊᕕᒃᑐᖅᓯᒪᓂᐅᑉ ᐊᒥᓱᓄᑦ ᑰᖑᔪᓄᑦ ᐊᒻᒪᓗ ᑕᓯᐅᔪᓄᑦ ᑕᑯᔪᓐᓇᕋᔭᖅᖢᑎᒃ ᐊᔾᔨᒌᙱᕈᓘᔭᖅᑐᓂ ᐆᒪᔪᓂᑦ ᑕᐅᕙᓂᕐᒥᐅᑕᐅᔪᓂᑦ. ᑖᒃᑯᓇᓂ ᐆᒪᔪᓂᑦ ᐃᓂᖃᒐᔪᒃᑐᓂ ᐅᑯᐊᖑᕗᑦ, ᑐᒃᑐᐃᑦ, ᐅᑭᐅᖅᑕᖅᑐᒥ ᐊᒪᕈᐃᑦ, ᐊᐃᕖᑦ, ᓇᑦᑏᑦ, ᐅᑲᓖᑦ. ᐊᒻᒪᓗ ᕿᓚᓗᒐᑦ, ᐊᒻᒪᓗᑦᑕᐅᖅ ᐊᒥᓱᐊᓗᐃᑦ ᑎᖕᒥᐊᑦ ᓲᕐᓗ ᑭᒡᒐᕕᐊᕐᔪᐃᑦ, ᐊᕿᒡᒋᑦ, ᖁᐸᓄᐊᑦ, ᐊᒻᒪᓗ ᐅᒃᐱᕐᔪᐊᑦ. ᒥᐊᓂᕆᔨᐅᔪᑦ ᐅᐸᒍᔾᔨᔪᓐᓇᖅᐳᑦ ᓯᓈᒧᑦ ᕿᒥᕐᕈᐊᖅᑎᑦᑎᔭᖅᑐᕐᓗᑎᒃ ᖃᐅᓪᓗᖅᑕᓂ ᕿᓚᓗᒐᕐᓂ ᐊᒻᒪᓗ ᐊᓯᖏᓐᓂ ᐃᒪᕐᒥᐅᑕᓂᑦ ᐆᒪᔪᓂᑦ. ᑎᓂᓐᓂᖓ ᐅᓕᓐᓂᖓ ᑭᒻᒥᕈᒻᒥ ᑲᒪᓇᖅᐳᑦ, ᐊᒻᒪᓗ ᐃᒪᖓᑕ ᑭᒡᓕᖏᑦ ᐊᔾᔨᒌᙱᑦᑑᑕᐅᕐᔪᐊᖅᐳᑦ, ᓴᖅᑭᑎᑦᑎᕙᒃᖢᑎᒃ ᓯᕐᒥᓂᑦ ᐅᑭᐅᒃᑯᑦ. ᐅᑭᐅᖓ ᓂᒡᓚᓱᒃᑲᓗᐊᖅᑎᓪᓗᒍ, ᖃᓄᐃᓕᐅᒐᒃᓴᖃᕈᓘᔭᖅᐳᖅ, ᐃᓚᖃᖅᖢᓂ ᓯᐊᕐᕆᔭᐅᑎᑯᑖᒃᑰᕐᓂᕐᒥᑦ, ᓯᑭᑑᕐᓂᕐᒥᑦ ᐊᒻᒪᓗ ᕿᒧᒃᓯᕐᓂᕐᒥᑦ.
ᐅᓪᓗᒥ ᐊᐅᓪᓛᕐᓂᖃᕈᓐᓇᖅᐳᖅ ᑕᐅᕙᓂ ᑭᒻᒥᕈᑦ ᖃᓂᒋᔭᖓᓂ, ᐊᒻᒪᓗ ᑲᔾᔮᕐᓇᖅᑐᑦ ᐱᓯᔪᒡᕕᐅᔪᑦ ᑐᕌᖅᑎᑦᑎᓂᐊᖅᐳᑦ ᑲᔾᔮᕐᓇᖅᑐᒻᒪᕆᐊᓗᖕᓂ ᑰᕌᓗᖕᓂ ᐊᒻᒪᓗ ᐳᖅᑐᔪᒻᒪᕆᐊᓗᖕᓂ ᖃᖅᑲᓛᓗᖕᓂ, ᐊᒻᒪᓗᑦᑕᐅᖅ ᐱᕕᖃᕈᓐᓇᕐᓂᐅᔪᒥ ᑕᑯᓂᕐᒧᑦ ᖃᔅᓯᒐᓴᓂ ᐊᔾᔨᐅᙱᑦᑑᑎᓂᑦ ᑎᖕᒥᐊᖑᔪᓂᑦ ᐊᒻᒪᓗ ᐆᒪᔪᓂᑦ ᐊᖏᕐᕋᖃᖅᑐᓂ ᑕᒫᓂ ᐊᕙᒃᑐᖅᓯᒪᓂᐅᔪᒥᑦ. ᐃᒪᕐᒻ ᖃᔭᖅᑐᖅᑎᐅᔪᑦ ᕿᒥᕐᕈᔪᓐᓇᖅᐳᑦ ᐃᒪᖓᓐᓂ ᐃᑭᕋᓴᕐᔪᐊᒥᑦ ᑕᓯᐅᔭᕐᔪᐊᖓᓂ, ᐅᒥᐊᖅᑐᖅᑎᐅᔪᑦ ᐊᒻᒪᓗ ᑰᖕᒥ ᖃᔭᖅᑐᕈᓐᓇᖅᐳᑦ ᑰᔾᔪᐊᕐᒥ. ᖃᐅᔨᒋᐊᒃᑲᓐᓂᕐᓂᕐᒧᑦ ᑲᑕᓐᓂᓕᒃ ᒥᕐᙳᐃᖅᓯᕐᕕᖓᓂ ᐊᒻᒪᓗ ᖃᓄᐃᓕᐅᕈᓐᓇᕐᒪᖔᖅᐱᑦ ᑭᒻᒥᕈᑦ ᖃᓂᒋᔭᖓᓂ, ᐅᐸᒍᒃ ᐅᑯᐊ ᑐᕌᒐᒃᓴᐅᔪᑦ ᖃᕋᓴᐅᔭᑎᒍᑦ: ᑲᑕᓐᓂᓕᒃ ᓄᓇᕗᒻᒥ ᒥᕐᙳᐃᖅᓯᕐᕕᒃ.
ᐊᖑᓇᓱᒡᕕᐅᔪᓐᓇᖅᖢᓂ ᐊᒻᒪᓗ ᐃᖃᓗᒐᓱᒡᕕᐅᔪᓐᓇᖅᖢᓂ ᐊᕕᒃᑐᖅᓯᒪᓂᐅᔪᒥ, ᐱᖃᕆᐊᖃᕐᓂᖃᖅᐳᖅ ᐱᔪᓐᓇᐅᑎᒥᑦ ᐊᒻᒪᓗ ᐱᓕᕆᐊᖑᔭᕆᐊᖃᖅᖢᓂ ᐃᓚᒋᔭᐅᓗᓂ ᐱᔪᓐᓇᐅᑎᓂᖕᒥᑦ ᒥᐊᓂᕆᔨᐅᔪᒥᑦ. ᐃᒪᖓᓂ ᐊᒻᒪᓗ ᐊᒥᓱᓂ ᑰᖑᔪᓂ ᖃᓂᒋᔭᖓᓂ, ᐳᓚᕋᕐᓂᖃᕈᓐᓇᖅᐳᑦ ᑕᒪᒃᑮᓄᑦ ᐃᖃᓗᒐᓱᖕᓂᕐᒥᑦ ᐃᖃᓗᖕᓂᑦ ᐊᒻᒪᓗ ᐆᒐᕐᓂᑦ, ᒪᓕᒡᓗᒍ ᐊᕐᕌᒎᑉ ᐃᓚᖓᓐᓂ. ᖃᐅᔨᒋᐊᒃᑲᓐᓂᕋᓱᐊᕐᓂᕐᒧᑦ ᑕᒪᑐᒥᖓ ᐊᒻᒪᓗ ᐊᓯᖏᓐᓂ ᐱᓕᕆᐊᒃᓴᐅᔪᓐᓇᖅᑐᓂ ᑐᓂᔭᐅᔪᓐᓇᖅᐳᑦ ᓄᓇᓕᖕᓂ ᒪᔪᑲᓕᒃ ᐊᖑᓇᓱᒃᑎᓂᑦ ᒥᑭᒋᐊᕐᓂᐊᖅᑏᓪᓗ (HTA) ᑐᓂᓯᔪᓐᓇᕐᒥᔪᓂ ᒥᐊᓂᕆᔨᐅᔪᓂᑦ ᐳᓚᕋᖅᑐᓄᑦ ᐊᒻᒪᓗ ᑐᔪᕐᒥᕕᒃᓴᐅᔪᓐᓇᕋᔭᖅᑐᓂ ᑭᒻᒥᕈᒻᒦᓐᓂᕐᓂᑦ. ᐊᖑᓇᓱᒃᑎᓂᑦ ᒥᑭᒋᐊᕐᓂᐊᖅᑏᓪᓗ ᐋᖅᑭᒃᓱᐃᓲᖑᒋᕗᑦ ᐊᖑᓇᓱᖕᓂᐅᔪᓂ ᐊᐅᓪᓛᕐᓂᐅᔪᓂᑦ ᐃᓚᐅᔪᒪᔪᓂᑦ ᐊᕐᕌᒎᑉ ᐃᓚᖓᓐᓂ ᑐᒃᑐᓕᐊᕐᓂᐅᔪᒥᑦ ᓇᓄᕐᒥᓪᓘᓐᓃᑦ ᐊᖑᓇᓱᖕᓂᐅᔪᓂᑦ (ᖃᐅᔨᒋᐊᕈᒃ ᐊᖑᓇᓱᒃᑎᓂᑦ ᒥᑭᒋᐊᕐᓂᐊᖅᑏᓪᓗ ᐊᐅᓚᑦᑎᔨᐅᔪᖅ: 867 939 2355). ᐊᖑᓇᓱᒃᑎᓂᑦ ᒥᑭᒋᐊᕐᓂᐊᖅᑏᓪᓗ ᑐᓂᓯᓲᖑᑎᓪᓗᒋᑦ ᓇᓄᕐᓄᑦ ᐊᖑᓇᓱᖕᓂᕐᒧᑦ ᐱᔪᓐᓇᐅᑎᓂᑦ, ᐊᐅᓪᓚᖅᑎᑦᑎᓂᕐᒧᑦ ᐱᔪᓐᓇᐅᑏᑦ ᑐᒃᓯᕋᖅᑕᐅᔭᕆᐊᖃᖅᐳᑦ ᓄᓇᓕᖕᓂ ᐆᒪᔪᓕᕆᔨᒃᑯᓐᓂ. ᐃᖃᓗᒐᓱᖕᓂᐅᑉ ᐊᒻᒪ ᐊᖑᓇᓱᖕᓂᕐᒧᑦ ᐊᓯᐊᒍᑦ, ᐊᒻᒨᒪᔪᖅᑕᖃᕆᕗᖅ ᐊᒻᒪᓗ ᐅᕕᓗᐊᓗᖕᓂᑦ ᑲᑎᖅᓱᖅᑕᐅᔪᓐᓇᖅᑐᓂ ᓄᓇᓕᖕᓂ ᓯᒡᔭᖏᓐᓂ. ᐅᔭᕋᖕᓂᐊᖅᑎᐅᔪᓄᑦ ᖃᔅᓯᒐᓚᖕᓂ ᐊᑭᑐᔫᑎᓂᑦ ᐅᔭᕋᖅᑕᖃᐅᖅᐳᖅ ᓇᓂᔭᐅᔪᓐᓇᖅᑐᓂ ᑭᒻᒥᕈᑦ ᖃᓂᒋᔭᖓᓂ, ᐃᓚᖃᖅᖢᓂ ᐃᑕᖃᒐᔪᙱᕕᒡᔪᐊᖅᑐᓂ ᓛᐱᔅ ᓚᓱᓕᒥᑦ. ᑲᑎᙵᐅᖅᑐᓂ ᒑᓂᑦᒥ, ᓵᕙᐃᔭ, ᑐᐊᒥᓖᓐ ᐊᒻᒪᓗ ᔅᐸᐃᓄᓪᒥ ᐱᑕᖃᕆᕗᖅ, ᐊᒻᒪᓗ ᐱᕙᓪᓕᐊᔪᓕᕆᔨ (ᐅᖃᓘᑎᖓ: 867-939-2247) ᑐᓂᓯᔪᓐᓇᖅᐳᖅ ᐳᓚᕋᖅᑎᐅᔪᓂ ᓄᓇᙳᐊᓂ ᒥᐊᓂᕆᓂᐊᖅᑐᒧᑦ ᐊᕕᒃᑐᖅᓯᒪᓂᐅᔫᑉ ᐊᒥᓱᓂ ᓄᓇᐅᔪᒧᑦ ᑕᑯᔪᒥᓇᖅᑑᑎᖏᓐᓂ.
ᓄᓇᓕᖕᓂ
ᑲᑕᓐᓂᓕᒃ ᒥᕐᙳᐃᖅᓯᕐᕕᒃ ᑐᕌᒐᕆᔭᐅᓂᐊᖅᐳᑦ ᐊᒥᓱᓄᑦ ᐳᓚᕋᖅᑐᓄᑦ ᑭᒻᒥᕈᒻᒧᐊᖅᑐᓄᑦ, ᑭᓯᐊᓂ ᐃᒃᓯᓐᓇᓪᓗᐊᙱᑕᐃᑦ ᓄᓇᓕᖓᓐᓂ ᐃᒻᒥᓂᒃ, ᑕᑯᓐᓇᒐᒃᓴᖅᑕᖃᐅᕐᒪᑦ ᐊᒻᒪᓗ ᐱᓕᕆᐊᒃᓴᖅᑕᖃᖅᖢᓂ ᓄᓇᓕᖕᓂᑦ. ᑲᑕᓐᓂᓕᒃ ᒥᕐᙳᐃᖅᓯᕐᕕᖕᒧᑦ ᐳᓛᕐᕕᖓ ᑕᑯᑎᑦᑎᔪᓐᓇᖅᐳᑦ ᐳᓚᕋᖅᑎᐅᔪᓂᑦ ᐊᕕᒃᑐᖅᓯᒪᓂᐅᔪᒥᑦ, ᐊᒻᒪᓗ ᐅᖃᐅᓯᒃᓴᖃᐅᖅᑐᓂ ᑕᑯᒃᓴᐅᑎᑦᑎᓂᖃᖅᐳᑦ ᐱᔾᔪᑎᓕᖕᓂ ᓄᓇᓕᖕᓂ ᐃᓕᖅᑯᓯᐅᔪᒥᑦ, ᖃᓄᐃᑉᐸᓚᐅᕐᓂᖏᓐᓂ ᐊᒻᒪᓗ ᓄᓇᖓᓐᓂ. ᑕᑯᕚᒃᓴᐅᔪᓂ ᐊᑐᐃᓐᓇᐅᒋᕗᑦ ᓂᐅᕕᐊᒃᓴᐅᓪᓗᑎᒃ ᐅᕙᓂ. ᐳᓚᕋᕐᕕᖕᒥᑦ, ᐋᖅᑭᒃᓱᖅᑕᐅᑎᑦᑎᔪᓐᓇᖅᐳᑎᑦ ᑕᑯᒃᓴᐅᑎᑦᑎᓂᕐᒥᑦ ᐱᖅᑯᓯᑐᖃᖅᑎᒍᑦ ᓴᓇᐅᒐᓂ ᐊᒻᒪᓗ ᐊᓯᖏᓐᓂ ᐱᓕᕆᓂᐅᔪᓂᑦ ᓲᕐᓗ ᐱᖅᑯᓯᑐᖃᖅᑎᒍᑦ ᒥᖅᓱᕐᓂᕐᓂ ᓇᑦᑎᐅᑉ ᕿᓯᖏᓐᓂ ᐊᒻᒪᓗ ᑐᒃᑑᑉ ᐊᒥᖏᓐᓂ, ᕿᓚᐅᔾᔭᕐᓂᐅᔪᓂᑦ, ᑲᑕᔾᔭᖅᑐᓂ, ᐸᓚᐅᒑᓕᐅᕐᓂᕐᒥᑦ, ᐊᑐᒐᒃᓴᓂ ᐱᐅᓴᐅᑎᓂᑦ ᓴᓇᓂᕐᒧᑦ, ᐊᒻᒪᓗ ᐊᔭᕌᖅᑐᓂᑦ. ᐊᔪᕐᓇᙱᒃᑭᕗᖅ ᐳᓛᕐᓂᕐᒧᑦ ᓄᓇᓕᖕᓂ ᓴᓇᐅᒐᓕᕆᔨᐅᔪᓄᑦ ᐱᓕᕆᑎᓪᓗᒋᑦ ᓴᓇᙳᐊᒐᔪᑦ ᐊᒻᒪᓗ ᑑᒑᕐᒧᑦ ᓴᓇᙳᐊᕐᓂᐅᔪᒥᑦ ᐱᓕᕆᔪᓂᒡᓘᓐᓃᑦ ᐊᓯᖏᓐᓂ. ᓄᓇᓕᖕᓂ ᐱᕙᓪᓕᐊᔪᓕᕆᔨ ᐋᖅᑭᒃᓱᐃᔪᓐᓇᕆᕗᖅ ᐳᓚᕋᕐᓂᐅᔪᓂᑦ.
ᐊᒥᓱᓂ ᐃᑦᑕᕐᓂᓴᓂ ᐃᒡᓗᕐᒧᐸᖅᑕᖃᐅᖅᐳᖅ ᓄᓇᓕᐅᔪᓂ ᐅᐸᒍᓐᓇᖅᑕᕐᓂ, ᐃᓚᖃᖅᖢᓂ ᓯᕗᓪᓕᖅ ᐸᓖᓯᒃᑯᑦ ᓄᓇᓕᕋᓛᓂ ᐃᓂᒋᓚᐅᖅᑕᖓᓂ ᓴᓇᔭᐅᓂᑯ 1915-ᒥᑦ, ᓂᐅᕕᖅᑎᒃᑯᑦ ᐃᒡᓗᖁᑎᕕᓂᖏᓐᓂ (ᑕᒫᓂᒐᓚᒃ 1911) ᐊᒻᒪᓗ ᐋᖕᓕᑲᒃᑯᑦ ᑐᒃᓯᐊᕐᕕᖓᑦ (ᑕᒫᓂᒐᓚᒃ 1909). ᓲᐳᕐ ᐃᒡᓗᕐᔪᐊᖅ ᑕᑯᓐᓇᒐᖃᕐᕕᒃ, ᐃᒡᓗᖃᖅᑎᑕᐅᔪᖅ ᐃᑦᑕᕐᓂᓴᒥ ᐊᖏᕐᕋᐅᔪᒥ ᓴᓇᔭᐅᓂᑯᒥ ᒐᕙᒪᒃᑯᓐᓂ ᐆᒪᔪᓕᕆᔨᒧᑦ ᑑᕕ ᓲᐳᕐᒧᑦ, ᑕᑯᒃᓴᐅᑎᑦᑎᕗᖅ ᐊᒥᓱᓂ ᓄᓇᓕᖕᓂ ᑎᑎᕋᐅᖅᔭᖅᑕᐅᓂᑯᓂ ᐊᒻᒪᓗ ᓴᓇᐅᒐᓂ. ᐅᓪᓗᒥ, ᐊᐅᓚᑕᐅᕗᖅ ᖁᓕᕈᐊᒃᑯᑦ ᑎᑎᕋᐅᔭᖅᑎᓂ ᐊᒻᒪᓗ ᓴᓇᐅᒐᓂ ᑲᑐᔾᔨᖃᑎᒌᖑᔪᓂᑦ. ᖃᐅᔨᒋᐊᒃᑲᓐᓂᕐᓂᕐᒧᑦ ᐅᖃᐅᓯᒃᓴᓂ ᖃᐅᔨᒋᐊᕈᒃ ᐅᖃᓗᒡᓗᑎᑦ: (867) 939-2247.