ᐃᓚᒋᔭᖓ ᑭᒻᒥᕈᒻᒥ ᐱᐅᓂᖓᓂ ᐅᖓᓯᖕᓂᕆᔭᖓᓂ. ᐊᖅᑯᑎᑕᖃᙱᑦᑐᖅ ᓄᓇᕗᒻᒧᑦ ᑕᐃᒫᒃ ᐅᐸᒃᑕᐅᔭᕆᐊᖃᖅᐳᖅ ᖃᖓᑕᓲᒃᑯᑦ ᐃᒪᒃᑯᓪᓘᓐᓃᑦ. ᑭᒻᒥᕈᑦ ᐅᐸᒃᑕᐅᔪᓐᓇᖅᐳᖅ ᖃᖓᑕᓲᒃᑯᑦ ᐊᒻᒪᓗ ᐅᐸᒃᑕᐅᕙᒃᖢᓂ ᒪᕐᕉᖕᓂ ᖃᖓᑕᓲᖃᖅᑎᐅᔪᓂᑦ – ᕘᔅᐃᐊ ᐊᒻᒪᓗ ᑭᐊᓐ ᐳᐊᕋᒃᑯᓐᓂ. ᑎᓴᒪᓂ ᖃᖓᑕᓲᖃᕐᓇᐅᕗᖅ ᐱᓇᓱᐊᕈᓯᕐᒥ ᐃᖃᓗᖕᓂ ᓄᓇᓕᖅᐸᐅᔭᐅᓪᓗᓂ ᓄᓇᕗᒻᒥ ᐊᒻᒪᓗ ᐃᖏᕐᕋᕕᐅᒐᔪᒃᑐᒥ. ᖃᖓᑕᓲᑦ ᓄᓇᕗᒻᒥ ᑭᒻᒥᕈᒻᒧᑦ 30 ᒥᓂᑦ-ᐸᓘᕗᑦ. ᑕᒪᒃᑮᑦ ᖃᖓᑕᓲᖑᔪᑦ ᓵᑕᒐᒃᓴᐅᒋᕗᑦ. ᐃᖃᓗᖕᓄᐊᕋᓱᐊᕐᓗᓂ, ᑕᒪᒃᑮᑦ ᕗᔅᐃᐊ ᐊᒻᒪᓗ ᑲᓇᑕᒥ ᐅᑭᐅᖅᑕᖅᑐᒥ ᖃᖓᑕᓲᖅᑎᑦ ᖃᐅᑕᒫᑦ ᐊᑐᐃᓐᓇᖃᖅᐳᑦ ᖃᖓᑕᓲᓂ ᐋᑐᕚᒥ, ᖃᓂᓛᖑᔪᒥ ᖃᓪᓗᓈᑦ ᓄᓇᖓᓐᓂ. ᖄᒃᑲᓐᓂᐊᒍᑦ, ᐱᖓᓱᐃᖅᑐᖅᑐᒥ ᐱᓇᓱᐊᕈᓯᕐᒥ ᒪᓐᑐᓕᐊᒥ ᐃᖃᓗᖕᓄᑦ ᐊᒻᒪᓗᑦᑕᐅᖅ ᐃᐊᑦᒪᓐᓇᓐᒥ ᐃᖃᓗᖕᓄᑦ ᔭᓗᓇᐃᑎᒍᑦ ᐊᒻᒪᓗ ᑲᖏᖅᖠᓂᕐᒥᑦ. ᑕᐃᑲᙵᑦ ᖃᖓᑕᔪᓐᓇᖅᐳᑎᑦ ᑭᒻᒥᕈᒻᒧᑦ.
ᓂᕈᐊᒐᒃᓴᒃᑲᓐᓂᐅᔪᖅ ᕿᒥᕐᕈᑦᑎᐊᕐᓇᖅᑐᒥ ᐃᑭᐅᖅᑕᖅᑐᒥ ᓄᓇᖓᓐᓂ ᐃᒪᒃᑯᑦ, ᐳᓚᕋᕐᓗᓂ ᐳᓚᕋᕐᓂᕐᒧᑦ ᐅᒥᐊᕐᔪᐊᒃᑯᑦ. ᑕᒪᓐᓇ ᐱᓕᕆᔾᔪᔾᔨᓂᐅᔪᖅ ᐊᑐᐃᓐᓇᐅᒐᔪᒃᐳᖅ ᔪᓚᐃᒥ ᓯᑎᐱᕆᒧᑦ. ᐳᓚᕋᖅᑐᑦ ᐅᒥᐊᕐᔪᐊᒃᑯᑦ ᑲᒻᐸᓂᐅᔪᑦ ᐊᓯᔾᔨᖅᑕᖅᐸᒃᐳᑦ ᐊᕐᕌᒍᒥ ᐊᕐᕌᒍᒧᑦ, ᑕᐃᒪᓐᓇ ᐱᐅᓂᖅᓴᐅᕗᖅ ᖃᐅᔨᒋᐊᕐᕕᒃᓴᒥ ᓄᓇᕗᒻᒥ ᐳᓚᕋᓐᓂᕐᒧᑦ (www.nunavuttourism.com) ᐅᓇᓘᓐᓃᑦ ᑲᑕᓐᓂᓕᒃ ᐳᓚᕋᕐᕕᖓᓂ ᑭᒻᒥᕈᒻᒥᑦ ᒫᓐᓇᐅᓕᖓᓛᓂ ᐅᖃᐅᓯᒃᓴᓂ ᐱᔾᔪᑎᓕᖕᓂ ᐳᓚᕋᕐᓂᕐᒧᑦ ᐅᒥᐊᕐᔪᐊᒃᑰᖅᐸᒃᑐᓂ ᑭᒻᒥᕈᓕᐊᖅᐸᒃᑐᓂᑦ.
ᑭᒻᒥᕈᑦ ᖃᓂᑦᑐᑯᓘᖕᒪᑦ ᐃᖃᓗᖕᓄᑦ (30 ᒥᓂᑦᑐᐃᓐᓇᖅ ᖃᖓᑕᓲᒃᑯᑦ), ᐳᓚᕋᖅᑎᐅᔪᑦ ᑲᒻᐸᓂᐅᔪᑦ ᓵᑕᖅᓯᔪᓐᓇᖅᑐᖅ ᐱᔪᒪᔪᓄᑦ. ᕿᒥᕐᕈᓇᒍᒪᔪᑦ ᑕᒪᑐᒥᖓ ᓂᕈᐊᒐᒃᓴᐅᔪᒥ, ᓯᕗᓂᐊᓂ ᐱᓇᓱᓪᓗᐊᖅᐳᑦ. ᐊᕙᑎᒧᑦ-ᐳᓚᕋᓐᓂᕐᒧᑦ ᑲᑎᙵᔪᑦ ᐃᖏᕐᕋᓂᐊᖅᑐᑦ ᑲᑕᓐᓂᓕᒃ ᓄᓇᕗᒻᒥ ᒥᕐᙳᐃᖅᓯᕐᕕᖕᒧᑦ ᑐᕌᖓᓂᖃᕐᓂᐊᖅᐳᑦ ᑭᒻᒥᕈᒻᒥ ᐅᐸᒐᒃᓴᕆᓗᓂᐅᒃ.
ᐅᑭᐅᒃᑯᑦ, ᐊᑐᐃᓐᓇᖃᕈᓐᓇᖅᐳᑎᑦ ᑭᒻᒥᕈᒻᒥ ᓄᓇᒃᑯᑦ ᐃᖃᓗᖕᓂ ᓯᑭᑑᒃᑯᑦ, ᐃᖏᕐᕋᕕᐅᒐᔪᒃᑐᒥ ᐃᑎᔾᔭᒋᐊᖅ ᐃᒡᓕᓂᖓᓂ. ᐃᑦᑕᕐᓂᓴᐅᓪᓗᓂ ᐃᒡᓕᓂᐅᕗᖅ ᐊᐅᓚᔪᒥ 120 ᑭᓛᒥᑐᒥᑦ ᐅᕘᓇ ᑲᑕᓐᓂᓕᒃ ᒥᕐᙳᐃᖅᓯᕐᕕᖓᒍᑦ. ᐊᑯᓂᐅᓂᖓ ᐃᑲᕐᕋᓄᑦ 6-ᓅᐸᓗᒃᐳᖅ, ᑭᓯᐊᓂ ᐊᑯᓂᐅᓂᖓ ᒪᓕᖕᓂᖃᕈᓐᓇᖅᐳᖅ ᐊᐳᑎᐅᑉ ᖃᓄᐃᓐᓂᖓᓂ ᐊᒻᒪᓗ ᓯᓚᒧᑦ. ᐅᖅᑯᐊᖃᐅᖅᑐᖅ ᐃᓂᖓᓂ. ᐃᓱᒪᒍᕕᑦ ᑕᒪᑐᒥᖓ ᓂᕈᐊᒐᒃᓴᐅᔪᒥᑦ, ᐅᖃᖃᑎᖃᓪᓗᐊᖅᐳᑎᑦ ᑲᑕᓐᓂᓕᒃ ᒥᕐᙳᐃᖅᓯᕐᕕᖕᒧᑦ ᐳᓚᕋᕐᕕᖕᒧᑦ ᐊᒻᒪᓗ ᐊᑑᑎᓕᖕᓂ ᖃᕋᓴᐅᔭᑎᒍᑦ ᑐᑭᓯᒋᐊᖅᑕᕐᕕᓂᑦ ᐅᕙᓂ: www.nunavutparks.com.